Правилен сооднос меѓу дарежливост и скржавост

19.04.2018

Општо прифатено е да се радуваме на дарежливите деца, да ги фалиме, да ги даваме за пример. Скржавоста кај децата се оценува негативно. Но зошто децата се различни?

До 2 години детето не се поврзува со конкретни предмети. Во периодот од втората до третата година детето сфаќа дека предметите му припаѓаат само нему. Играчки, облека, боенки. Возрасните многу поразлично ги доживуваат предметите од децата.

За детето “Мое” е дел од “Јас”. Обидот на друго дете да ја земе играчката се смета за посегнување врз личноста и нормално е детето да реагира бурно. Одбивањето на детето да дели не е егоизам, туку обид за заштита на своето јас. На тој начин детето ја искажува својата независност.

Поистоветувањето на детето со сопствените играчки не важи за другите деца и туѓите играчки. Оттука почнуваат конфликтите. Детето се обидува да ги зачува своите играчки, додека освојува туѓи. Мировните преговори во овој случај се невозможни. Детето не прашува и не се обидува да преговара. Бесмислено е да разговарате со него и да го советувате. Сеуште е рано.

На детските игралишта често сме сведоци на тоа како мајките им објаснуваат на своите деца дека треба да ги споделуваат своите играчки.

Тоа е вистинскиот пристап за да воспитате дарежливо дете – но внимавајте! Ако постојано му објаснувате на детето дека со секого треба да споделува се, ризикувате кај своето дете да изградите слаб карактер кој не знае да каже “Не”. Ниту тоа нема да му користи многу во животот. Обидете се да најдете некаков баланс и дозволете му на детето да одлучи што ќе сподели, а што не.

Кога го водите детето на игралиште, носете сопствени играчки. Објаснете му на детето дека треба да се вратите со нив дома и дека не треба да ги присвојувате туѓите играчки. На слична ситуација може да бидете сведок и во градинка. Кога ќе го земате детето може да забележите дека има нешто туѓо во своето шкафче. Не започнувајте да го карате детето. Тоа не е кражба. Објаснете му дека за да земе нешто треба да има дозвола од сопственикот. Замолете го детето да ја врати играчката кај сопственикот.

Постојат и обратни ситуации во кои детето великодушно дели се свое, предизвикувајќи симпатии кај сите наоколу и иритација кај своите родители што не ги чува своите интереси. Оваа дарежливост може да се стекне ако сте претерале со лекции за скржавоста, па детето преминало во друга крајност. Друга причина на која се должи детскиот алтруизам можеби е начин на детето да го “купи” вниманието на луѓето околу себе. Трет пример е дете кое се плаши да каже “Не” за да не ги изгуби своите пријатели и кое ќе се согласи на се' без разлика дали му се допаѓа или не.

Малите деца не прават голема разлика меѓу подарувањето и позајмувањето. Тие реагираат импулсивно. Им подаруваат свои работи на пријателите, но исто така и присвојуваат туѓи работи без дозвола. Објаснете му на детето што значи подарокот. Да се подари нешто значи да му се даде на некого засекогаш. Подароци можат да се даваат со повод и без повод. Објаснете му ги двете страни: великодушноста и скржавоста. Вашата цел треба да биде да направите баланс меѓу овие две карактерни црти и да развиете соодветно однесување кај детето. Воспитувајте го детето да подарува, но пред тоа да се посоветува со Вас. Многу е важно да го научите да Ве праша, пред да одлучи да присвои нешто туѓо.

Најтешко е да развиете правилен сооднос меѓу дарежливост и скржавост. Имајте на ум дека Вие сте најавторитетен пример за детето и дека детето учи од Вас и Вашите постапки.


Сиче Талеска
Едукатор
Едукативен центар Сонце

© ЕЦ СОНЦЕ - сите права задржани